Thursday, September 29, 2011

Papaalis na OFW - First Time

Karamihan sa mga OFW na first time pa lang aalis ay walang pamilyang naghahatid sa airport. Sa agency muna ito pupunta para sa final briefing at ang agency na rin ang maghahatid sa airport. Maliban na lang kung napagkasunduan mo at ng iyong agency na sa airport kayo magkikita. Siguraduhin lang na makakarating ng maaga. Ang iyong travel documents ay ibibigay din sa mga oras na iyon at kadalasang ibinibigay na sa airport. Halos lahat ng biyaheng Middle East ay nasa NAIA terminal 1.
Madaling malaman ang mga baguhang OFW sa airport dahil sa bitbit na brown envelope. Ganyan din ako noon! Magkagrupo at ang iba nakauniform pa.Bago pumasok sa airport, ang mga OFW ay papasok muna sa OFW lounge sa kanang bahagi ng airport. Sa mga first timer, dito ipinapaliwanag ng agency recruiter ang detalye ng flight at ang gagawin mo paglabas sa final destination mo. Kung sino ang kokontakin at kung may naghihintay sa atin sa destinasyon. Doon din tayo iniiwanan ng ating mga agency recruiters habang hinihintay ang pagbukas ng counter ng flight natin.
Nasa loob din ang POEA kung saan kailangan nating ipaverify ang ating OEC. Pipila ka dun para ito'y tatakan.
Makakabili ka rin ng roaming sim, at makaopen ng savings account sa loob habang naghihintay ng flight.
May screen sa loob na nagmomonitor ng mga flights. Excited ka pa dahil nga first time mong aalis. Kapag hudyat na para magcheck-in, bitbitin o hilahin na ang bag at pumila papasok sa airport.

1. Dadaan ka kay Mamang Guard. Iwasan ang magbitbit ng anumang bagay tulad ng celphone, ipad, player at iba pa. Ipasok ito sa bag mo. Pabilisan ang transaction dito kaya posibleng may mawala ka. Dadaan ang bagahe mo sa X-ray machine at ikaw ay sa metal detector device. Kaya mas mainam, na huwag magsuot ng mga metal at panatilihing simple sa biyahe. IPAPAKITA MO: itinerary flight ticket at passport. IBABALIK SAYO: ang ipinakita mong dokumento.

2. Hanapin mo ang counter ng iyong eroplano at pumila. Ihanda ang iyong passport(visa). May airline personnel na magveverify nito, May nagpapartial check din ng bagahe mo kung ito'y overweight kaya iwasang magdala ng aparador. Papabawasan din sa iyo iyan. Allowed ang isang pasahero ng isang cabin bag.
Sa airline check in counter, may ground airline staff para magverify. IPAPAKITA MO: itinerary flight ticket, passport at OEC. IBABALIK SAYO: itinerary flight ticket, passport, OEC, boarding pass at baggage numbers ng check-in bags mo. Sasabihin din sa iyo ang mga informations na nakasulat sa boarding pass.

3.Kadalasan habang pumipila ka sa counter, may ibibigay sa iyong papel na galing sa POEA. Fill mo ito habang hindi ka pa busy, magagamit mo ito pagkatapos mong makuha ang boarding pass mo. Papasok ka na sa lugar na describe ng marami, ay may mga buwaya. Una ang POEA collecting counter, sa bandang kaliwa ang lane ng mga OFW. IPAPAKITA MO: boarding pass at OEC. IBABALIK SAYO: boarding pass at 2 copies ng OEC na m,ay tatak na OFW. Libre ka ng terminal at travel tax fees. 
Confirmed OFW ka!

4. Dumiretso ka na kaagad sa immigration counter.IPAKITA MO: passport, OEC, boarding pass at ang POEA form. IBABALIK SAYO: passport na may tatak na "depart", OEC, at boarding pass". Minsan may, itatanong din sa iyo, sagutin mo lang ng maayos.

5. Another security measures.IPAKITA MO: medyas mo! Hubarin ang belt, relos, pitaka, sapatos, at lahat na kumikinang at bakal sa katawan. Ang iyong gamit ay dadaan ulit sa X-ray at ikaw ay sa metal detector. Mas strikto dito, kaysa noong papasok pa lang sa airport. IBABALIK SAYO: perwisyo! Di na bale basta safe lang ang mga pasahero! Tandaang bawal ang liquid at gel sa cabin bags.

6. Pre-departure area. Paglapas mo ng Duty Free at pasalubong stores, ay hanapin mo ang gate na nakasaad sa iyong boarding pass. Ang Middle East ay nasa kanang bahagi ng hallway. IPAKITA MO: boarding pass at passport. Pipilasin nila ang boarding pass hudyat na ikaw ay nasa predeparture area na. IBABALIK SAYO: passport at ang maliit na parte ng boarding pass.

Magpahinga ka na! Ihanda mo ang sarili mo sa walong oras o higit pa na biyahe at habang naghihintay ng oras para mag check-in, tawagan mo o itext ang mga mahal mo sa buhay. Magpaalam ka ulit. Kung tutulo ang luha mo, hayaan mo lang. may ganun talagang eksena. Magtira ka lang ng isang daang peso para pangroaming ng sim mo.
Pag oras nang pumasok sa eroplano, huwag magmamadali. Hintayin mong tawagin ang iyong seat number na matatgpuan din sa iyong boarding pass. Walang ibang uupo sa upuang nakalaan para sa iyo. Iactivate mo na sa roaming ang telepono mo. Kung Smart sim ka, type ROAM ON at isend sa 333.

Wednesday, September 28, 2011

Legal na OFW sa Saudi

Ang legal na OFW sa Saudi ay may employment contract. Dito nakasulat ang pinagkasunduan mo at ng iyong employer. Nakasaad dito kung ilang taon ang kontrata, uri ng trabaho, schedule ng trabaho, sahod, at mga benipisyo. Pagkatapos ng kasunduan, ang agency na ang mag-aayos ng iyong mga dokumento. Itiwala mo lang sa kanila ang mga kailangang dokumento para maproseso ang iyong legal na pag-alis tulad ng visa. Tandaan na halos ang OFW sa Saudi ay walang placement fee.

Ang legal na OFW sa Saudi ay nakapagmedikal sa GAMCA(Gulf Accredited Medical Clinics Association). Sila ang mga lehitimong klinika para sa mga OFW na papuntang Middle East. Kung may matindi kang karamdaman at nakalusot ka sa GAMCA ay huwag maging kampante dahil uulitin ang mga medical test pagdating sa Saudi lalo na kapag malalaking kumpanya ang napasukan mo.
Ito ang mga GAMCA klinika sa Pilipinas courtesy of Neil's Version blog.
  1. American Out-Patient Clinic
  2. Angelina Apostol Punzalan Medical Clinic
  3. Angelus Medical Clinic - dito ako nagpamedikal.
  4. Arguelles Medical Clinic
  5. Christian Cangco Medical Clinic
  6. International Diagnostic Clinic
  7. L-R Medical Clinic
  8. Mabini Medical Clinic
  9. Our Lady of Fatima Med Clinic
  10. Physicians Diagnostic Clinic
  11. Philippine Medical Test System
  12. Ruben Bartolome Medical Clinic
  13. S.M. Lazo Medical Clinic
  14. St. Martin Polyclinic
  15. St. Patrick’s Healthcare System
  16. St. Peter & Paul Medical Clinic
  17. St. Vincent Medical Clinic
Ang legal na OFW sa Saudi ay may working visa at entry visa.
Ang working visa yung nasa babang bahagi at ang entry visa yung maliit na stamp na may puno.
Ang legal na OFW sa Saudi ay nakakuha ng OEC (Overseas Employment Certificate) at nakapagbayad ng fees sa OWWA at Philhealth bilang mga miyembro. Ang OEC ang nagpapatunay na legal kang OFW.

Ang legal na OFW sa Saudi ay nakapag-attend ng PDOS (Pre-daparture Orientation Seminar). Mahalaga ito para sa atin para ating malaman ang mga batas na umiiral sa Middle East lalong lalo na sa Saudi Arabia.
Ang galing ng DOLE!

Marami na tayong nabalitaan na undocumented OFWs na kinulong at pinadeport. Sa hangaring mapadali ang pag-alis, dinaan na sa illegal na pamamaraan. Ang iba sa kanila ay inosente at wala talagang alam. Huwag na nating dagdagan pa! Huwag tayong magpapaloko!

Tuesday, September 27, 2011

Puhunan

Dahil gusto mong kumita ng malaki, kailangan mo rin ng malaking kapital. Pera lang ba ang pwedeng maging puhunan? Para sa akin, lahat ng bagay ay hindi kayang tapatan ng kwarta.
Kung ordinaryong papel lang ito, magbabasura na lang ako.

Ang pag-aabroad ay may kaakibat na pagod at paghahanda. Kasama na rin diyan ang excitement na kahit sabihin mong may iiwanan ka at mapapalayo ka sa mga mahal mo sa buhay. Iisipin mo na ginagawa mo ito para sa kanila. Kailangan e!
Ito ang mga puhunang kailangan mong paghandaan. Ito rin ang mga hinanda ko noong paalis pa lang ako.

Work Experiences - kailangan mong ipunin lahat ng mga work certificates mo. Hindi paramihan kundi pangmatagalan ang kadalasang binabasehan ng mga employer. Mas maganda sa paningin kung tumatagal ka sa isang kumpanya. Base sa mga napagdaanan kong mga interviews, naiintindihan ng interviewer kung sa unang dalawang kumpanya mo ay maikling taon lang ang itinagal mo. Syempre dahil naghahanap pa tayo ng "greener pasture" kumbaga. Pero kapag yung pangatlo at iba mo pang working experience ay less than a year din, nadidiscourage sila. Iisipin nila di ka rin tatagal at masasayang lang ang pagtraining nila sa iyo. Pero depende rin yan sa edad mo, mas marami kang experience, mas advantage.

Medikal -  mas maiging minomonitor natin ang ating kalusugan dahil ang katawan ang tunay na puhunan. Maraming sumasablay dito! May ibang bansa kasi na masyadong strikto na kahit kunting taas lang ng high blood pressure ay ayaw magbigay ng waiver. Ang mga medikal test na kadalasang ginagawa sa mga papaalis na mga Pinoy ay mga sumusunod: Blood tests, X-ray, ECG, vision test, stool, at  urine. Buti na nga lang di kasama ang audio. Marami kasing interruptions kapag ako'y isinasalang dito. Mas naririnig ko pang usapan sa kabilang kwarto at traysikel sa kalayuan kaysa sa tunog na nanggagaling sa headset. Sana may alternative test para dito. Kukunan ka din ng timbang, taas, at BP.
Meron ding physical exam by a doctor in a closed room kung saan kailangang mong isiwalat ang buo mong katawan. Iniinspect kung may tattoo tapos may dadakmahin, tatalikod, tutuwad, at uubo. Ganito ang ginagawa sa mga lalaki, ewan ko lang sa mga babae.
Meron ding psychological exam kung saan one on one interview naman with psychiatrist. Tatanungin ka lang naman kung ano ang iyong mga kahinaan at ang pinakahighlight dito ay kung kaya mo ba talagang umalis ng bansa. Kung malakas ang dedikasyon mo, wala kang magiging problema dito.

Pera - "kapag may pera ako, mag-aaply ako abroad". Mahirap mag-apply ng walang pera dahil wala namang libre sa panahon ngayon. Lahat may bayad!

Emosyon - kailangan mo rin itong paghandaan. Kailangan mong tapangan ang iyong emosyon. Kung may pag-aalinlangan ka, ay huwag ka nang umalis. Sinasayang mo lang ang oras sa pag-aaply na dapat ay para sa iyong pamilya. Kung talagang desidido, paghahandaan mo ang araw ng iyong pag-alis. Sigurado ako, may drama at teleserye sa raw na iyon.

Mahirap ang mga ginagawang preparasyon pero ano ba't babalik din sa iyo ito!

Monday, September 26, 2011

Dokumentadong Pinoy

Nakakatulong para mapagaan ang ating pag-apply at pag-alis kung kumpleto tayo sa papeles. Mga lehitimong dokument ang tinutukoy ko, at hindi iyong mga instant files na pinagawa sa Recto. Mas mainam na ikaw mismo ang gagawa para maging kabisado mo ang pasikot-sikot at masalimuot na kalakaran sa mga ahensiya ng ating gobyerno. Magkakaroon ka pa ng kumpiyansa sa sarili na kahit mga matatalinong fixers sa DFA ay di ka kayang pataubin. Iyon nga lang, nakakaubos ito ng oras kaya dapat may mga VL kang ititira o di kaya SL. Sabihin mo na lang sa boss mo na nagka-LBM o di kaya masakit ang ulo. Ito yong mga obvious na dahilan ngunit laging napapaniwalaan. Wala rin kasi silang magagawa kung ayaw mong pumasok sa trabaho.

Picture - mula sa 1x1 at 2x2,  dapat meron kang maraming stocks nito. Lahat ng mga papeles halos kailangan ito. Dapat yung pinakagwapo ka sa picture. Kung pwedeng awayin yong nagpipicture para lang iretoke yung mukha mo, ay gawin mo. Huwag tayong mahiya dahil mas nakakahiya kung madeny tayo dahil lang sa picture.

Diploma at TOR - walang problema dito kung pagkagraduate ay nakasecure ka na ng copy nito. Bukod doon sa nakaframe at nakasabit sa dingding ng bahay niyo, e dapat may sarili kang original copy. Ang original copy ay may zeal ng school. Para sigurado, ipaauthenticate mo na sa CHED o TESDA sa inyong lugar at ipa red ribbon sa Malakanyang. Kailangan kasi yan kung magtratrabaho ka sa U.S, Australia, Qatar o UAE. Ang Saudi Arabia ay di masyadong strikto sa ganito.

Birth and Marriage Certificate - mas mainam na may dalawang copy ng NSO authenticated birth certificate dahil para sa passport at sarili mong kopya. Nagdedeliver na rin sila ngayon kung talagang busy at di makaalibi sa trabaho. Click mo dito for more information.
Para ka lang umorder ng burger sa Mcdo!

Cedula - ito'y nakukuha sa municipal hall. Nagtataka nga ako kung bakit kailangan ko pang magbayad ng CEDULA gayong taxpayer naman ako. Iniisip ko na baka iba ang national sa municipal tax funds.

Clearances - unahin ang purok (kung meron) o barangay clearance dahil mas malapit. Sunod na kaagad ang police clearance. Tandaan na kapag magpakuha ng picture, dapat seryoso at nakatiklop ang bibig. Sita ang aabutin mo kapag tumabingi ka at nakasmile. Ganun din sa NBI clearance. Kailangan ang NBI clearance is issued for travel abroad. Nakakadelay lang sa NBI kung may kapangalan kang may kaso dahil kailangan pa ng imbestigasyon at kukuha ka pa ng mga certifications sa department na on hold ang pangalan mo.

Passport - electronic na ngayon. Kailangan mo lang ng appointment para sa schedule. Click mo dito kung gusto mo ng appointment at ang mga recent requirements. Di mo na rin kailangang magdala ng passport size pictures dahil sila na mismo ang kukuha. Kailangan mo lang ng mahabang pasensiya dahil kahit may appointment ka e, mahaba pa rin ang pila. Marami na talaga ang may balak na lumisan sa bansa.
Para sa akin mas ok ang sistema ng pagkuha ng passport ngayon.

Lahat ng mga transaction diyan ay kailangan ng mga valid ID's na nagpapatunay ng iyong pagkakakilanlan. Kailangan mo ring gumising nang maaga para mauna sa pilahan. Mahirap kasi kung pabalik balik ka dahil lalong nakakaubos ng lakas at pera.
Sa dami ng mga requirements at babayaran ay halos mamumulubi ka na. E ganun talaga! Ang pag-aaply sa abroad ay para ring nagtatayo ng business na kailangan ang puhunan.

Sunday, September 25, 2011

Malas o Swerte?

Trabaho - ito ang una nating hanapin kung tayo ay may balak na mag-abroad. Kung may kakilala ka sa abroad at may inioffer sa iyong trabaho, e aba napakaswete mo! Di mo na kailangang makipagsiksikan sa mga aplikante sa aplayan ng trabaho.

Apply - marami ang mga hiring sa mga agency sa Pilipinas, sa POEA job lists, at kahit sa internet tulad ng Work Abroad at Job Street. Ang paghahanap naman ng trabaho ay hindi madali. Kaya kung naiinip ka na sa kasalukuyan mong employer ay magtiis ka muna.Isipin mo na nasa Pilipinas pa rin ang may pinakamagandang workplace. Ugaliin mong bumili ng Philippine Daily Inquirer pagkatapos magsimba o magjogging tuwing linggo dahil marami ang job abroad lists sa classified section nito. Habang kumakain ka ng almusal sa bahay o kung sa Jolilbee, Mcdonalds, tapsilogan, gotohan man, umpisahan mo nang hanapin sa newspaper ang trabaho na bagay sa iyo.
Kapag nakahanap ka na, e di send ka kaagad ng iyong original at updated na resume. Advise ko lang, huwag mameke ng information mo dahil ipapahiya ka niyan balang araw. Pasa ka lang nang pasa kapag alam mo yong trabahong papasukin at may saktong experience ka. Kapag natangap ng employer ang CV mo at fit ka, kokontakin ka rin nila para sa interview.
Libre ito sa ibang establishment
Interview - kapag kailangan  ng employer ang isang katulad mo, e di interview na kaagad. Minsan may exam pa kaya kailangan mong magreview nang kaunti kahit sabihin mong kabisado mo ang trabaho. Pasado ka na!
Kung para sa iyo ang trabaho, madali mo itong maipapasa. At kung di naman, kahit anong apply at ilang interview ang danasin mo, di mo talaga ito makukuha. Kaya huwag kang mafrustrate kapag nabagsak ka dahil marami pa namang trabaho. Maghintay lang tayo ng tamang pagkakataon. May marami pang mas magandang kumpanya bukod doon. Kaya kapag sa Saudi ang trabaho mong nakuha at kung katulad mo rin ako na last choice ang Saudi, e huwag mong sabihing malas. Ito ay swerte!

Habang naghihintay, kumpletuhin mo na iyong mga dokumento.

Friday, September 23, 2011

Bakit Saudi?

Sagutin muna natin ang tanong kung bakit may OFW?
OFW ang tawag sa atin kapag tayo ay umaalis sa Pinas para makipagsapalaran sa ibang bansa sa hangaring makatisod ng bundok ng pera. Mabili ang lahat ng pangangailangan at matulungan ang pamilyang naghihirap.
PERA - ito ang unang dahilan dahil nga mahirap talaga sa Pinas.Obvious naman talaga! Sino ba naman ang di gustong umangat at maranasan ang kaginhawaan sa buhay.
AMBISYON -halos lahat sa atin, nangangarap na makapunta at maranasan ang pamumuhay sa ibang bansa. Makakita ng ibang lahi at kakaibang lugar. Sa dami kasi ng isla ng Pilipinas, ni kahit isa sa 1,107 ay walang ibang bansa na nakadikit.
KATANYAGAN - nagiging instant celebrity ka sa inyong lugar kapag galing ka sa ibang bansa. Sikat at lahat ng tao nag-iisip na marami kang nauwing pera!

Ang Saudi Arabia ay isa sa kilalang pinupuntahan ng mga OFW. Dati nga, akala ko, kapag sinabi nilang OFW, sila na yong galing sa Saudi. Sa dami ng kwentong masama, kalupitan, at kalungkutan ay halos galing sa lugar na ito. Ganunpaman, marami pa rin ang pumupunta sa Saudi. Ano bang meron sa lugar na ito na bakit binabalik-balikan ng mga manggagawang Pilipino?
Sila ba ang dahilan?

Isa na ako sa gustong gustong mag abroad. Sabi ko, kahit saang bansa pwede ako, huwag lang sa Saudi. Sa kakaiwas ko, ay bound to Saudi ang trabahong napasukan ko. Swerte o malas?