Bahrain: A Free Visa country for Filipinos (special category)

Visitors who have been resident in the GCC for a minimum of six months, and who posses a return visa for the country of GCC residency can obtain a free tourist visa in Bahrain. 
Source: http://www.alloexpat.com

Ang Bahrain ay miyembro ng GCC o Gulf Cooperation Council na kinumpleto ng bansang Kuwait, Qatar, United Arab Emirates, Oman, at Saudi Arabia. Malayang nakakapunta ang mga expat dito lalo na iyong nagtatrabaho sa Saudi dahil halos isang oras lang ang biyahe nito mula sa Al-Khobar, Eastern Saudi.

Paglampas pa lang ng immigration sa King Fahad Causeway ay nag-iiba na kaagad ang "aura" ng lugar. Iyong biglang gumaan ang pakiramdam na parang nakawala sa isang hawla. Maihahantulad ang Saudi sa isang kulungan para sa mga taong sanay sa kalayaan. Sa Bahrain, legal ang sinehan, club, disco, at ang mga babae ay may kalayaan sa trabaho at maging sa pagmamaneho.

Bahrain Immigration in King Fahad Causeway

Para makapasok ng libre sa Bahrain Immigration ang isang expat na galing ng Saudi, kakailanganin ang mga sumusunod:
- valid passport
- dapat technician pataas (white collar jobs) ang trabaho na nakasulat sa iqama o sa working visa
- may Saudi exit-reentry visa 

PINOY SPIRIT

Ang taxi na unang nasakyan ay minamaneho ng isang lokal na Bahraini. Ang ipinagkaiba niya lang ay dahil puro OPM ang ang nakasalang na musika sa audio ng sasakyan. Sinasabayan din niya ng bigkas at memoryado ang mga kanta tulad ng "Kanlungan".

Unang pinuntahan ang Cathedral sa Bahrain. Ilang buwan din kasing tigang sa ganitong gawain. Hindi naman nakalimutan ang magdasal pero iba pa rin talaga kapag sa simbahan ka mismo nakaapak para manalangin.

At higit sa lahat, dinayo ang mga Filipino restaurants at umorder ng kahit anong menu na may karneng baboy katulad ng crispy pata. Natatakam kasi sa karneng baboy na ipinagbabawal sa Saudi. Ngunit hindi ito kasing sarap katulad sa Pilipinas dahil  malamang frozen at hindi na sariwa. May mga alak din dito na dinadayo pa ng mga gustong maglasing.

Halos sa bawat establisyamento na napasukan ay may mga pinoy. Hindi nawawala ang lahing kayumanggi sa mga hotel, restaurants, at mga tindahan.

Great view of Manama City from Bahrain Holiday Villa Hotel

Heto ang mga lugar na madalas dinadayo ng mga Pinoy sa Bahrain:

Bahrain National Museum - short cut para sa mga nais matutunan ang kultura ng bansa.

Novotel Al Dana Hotel and Resort - sa mahilig magrelax at magswimming.

Arirang Edo Restaurant - kung hilig ang Japanese or Korean cuisines. Halos lahat ng mga staffs ay mga pinoy.

The Dolphin Resort - para makapanuod ng dolphin at sea lion tricks

Al Areen Wildlife Park - kapag nais makita ang naipreserbang lugar ng mga hayop at halaman na kadalasang makikita sa Middle East, at Africa.

Lost Paradise of Dilmun - isang outdoor water park sa gitna ng disyerto.

UAE: A Free Visa Country for Filipinos (special category)

Ang isang pinoy na kasalukuyang nakatira sa Saudi Arabia at may mataas na propesyon sa kanyang iqama katulad ng engineer, manager, accountant, at doktor ay malayang makakapasok sa United Arab Emirates ng libre. Kailangan lamang dalhin at ipakita ang orihinal na iqama sa immigration counter. 

Ang United Arab Emirates ay miyembro ng GCC o Gulf Cooperation Council na kinumpleto ng bansang Bahrain, Kuwait, Qatar, Oman, at Saudi Arabia.

 "Residents who are not GCC nationals, but, have high professional status, such as business men, company managers, accountants, auditors, engineers, doctors, pharmacists, or employees (and their families) working in the public sector, drivers and personal staff under their sponsorship, are all eligible for non-renewable 30-day visa on arrival, at approved points of entry. However, a valid passport with valid GCC residence stamp, along with proof of employment in the country of residence, may require to be produced for this category." -www.guide2dubai.com

Sa mga Pinoy na may employment status na hindi napabilang sa mga nabanggit ay may maraming paraan para makakuha ng visit visa sa UAE. Dito sa Saudi Arabia, tanging kopya ng pasaporte at iqama lamang ang hinihingi ng mga travel agent para masimulan ang proseso ng tourist visa na makukuha lamang sa loob ng ilang araw.

Isang oras na biyahe sa eroplano mula sa Saudi ay masisilayan ang progresibong siyudad ng Dubai at Abu Dhabi.

Mga OFW sa Dubai

Maraming Pinoy sa UAE lalong lalo na sa Dubai. Halos karamihan sa kanila ay nagtatrabaho sa mga hotel at restaurant. Kung tutuusin, mas maayos ang kalagayan nila kaysa sa amin na nasa Saudi. Mas malaya sila. Mas marami silang lugar na napapasyalan pagkatapos ng trabaho. May mas maraming kainan at pagkaing Pinoy. At higit sa lahat, may night life.

Ganunpaman, ayon sa mga naging kakuwentuhan ko, inaamin nila na mas mahirap mag-ipon sa UAE. Lahat kasi doon ay mahal katulad ng upa sa bahay. Ang standard of living ay mas mataas kung ihahantulad ito sa Saudi Arabia.

Turismo
 
Marami ang mga makabagong imprastraktura ang makikita sa UAE. Nandoon ang pinakamataas na gusali at ang  pinakamabilis na roller coaster sa buong mundo. Meron ding naglalakihang mga shopping mall na may sariling attractions. May snow village, may aquarium, at marami pang iba. Hindi ka rin makakaalis sa Dubai kapag hindi naranasan ang kanilang water parks, safari ride, at night dhow cruise.

Ito ang ilan sa mga magagandang lugar na makikita at may tatak UAE.

Dubai Miracle Garden

Burj Khalifa Visitors Deck

Burj Al Arab

Atlantis , The Palm

Abu Dhabi's Grand Mosque

Ferrari World Park

Maldives: A Free Visa country for Filipino

Marami na sa ating mga Pilipino ang nakakapunta o nakakagala sa ibang bansa.
Isang pagpapatunay na umaangat ang ating kakayahan na maglakbay at magtuklas ng mga bagong kultura maliban sa kakaibang tanawin na masisilayan lamang sa bansang bibisitahin.

Nang minsan kasabayan ko ang mga grupo ng mga kabataan sa isang domestic flight galing ng Davao, ay dinig ko ang kanilang usapan. "Pag-iipunan at pupuntahan ko talaga ang Maldives!".

Ang mga isla ng Maldives mula sa eroplano.

Maldives! Matagal ko nang naririnig ang lugar dahil maganda raw ang baybayin nito.
Saan ba yon? Paano pupuntahan? Anong sasakyan? Mura ba doon? 

At mula noon, naging interesado rin ako sa pagpunta ng Maldives lalo pa at napapabalita na ang ibang isla nito ay unti-unti nang lumulubog. 

Bago natapos ang taong 2015 ay napuntahan ko sa unang pagkakataon ang bansang pinapangarap ng mga taong mahilig maglakbay. Tama nga ang mga sinasabi ng mga taong nakakapunta na. Ito ang lugar na gustong gusto mong puntahan pero ayaw mo nang balikan lalo na sa usaping pinansyal.

Ang Maldives ay isang bansang binubuo ng mga maliliit na mga isla sa Indian Ocean. Mas malapit ito dito sa Saudi Arabia kaysa sa Pilipinas. Kapitbahay na bansa niya ang India at Sri Lanka kaya medyo magkakahawig ang mga mukha at kultura nila. At kahit sila ay nasakop ng Briton, nanatiling puro muslim ang bansa. Katulad ng Saudi, tanging Islam lamang ang kinikilalang relihiyon ng bansa kaya aasahan na wala kang makita na anino ng baboy.

Ang pagpunta sa Maldives ay hindi biro. Kailangan ng malaking halaga. Ganunpaman, kapag gusto ay may paraan. Kailangan lamang na pag-ipunan. Kailangang paghandaan para makarating sa Maldives ang isang katulad ko na ordinaryong OFW mula ng Saudi.

Inumpisahan ko munang maghanap ng eroplanong masasakyan. Apat na buwan bago ng bakasyon ay nabili ko na ang round-trip tiket sa Oman Air. Hindi kagandahan ang transit hours dahil sa medyo mababa ang presyo pero ang mahalaga ay marating ang pupuntahan. Ang paghahanap naman ng resort  ay masakit sa ulo. Ang mamahal at ang daming fees na babayaran. Napansin ko lamang, mas mahal ang mga resort na malapit sa kapitolyo ngunit mas mura ang pamasahe dahil speed boat ang kadalasang sasakyan na maghahatid sa isla. Ang mga malalayong resort na mahirap puntahan ay mas mababa ang presyo ngunit mahal ang pamasahe dahil seaplane ang sasakyan. Ang paggamit sa mga pampublikong sasakyang pandagat papunta sa malalayong mga isla ay hindi nirerekomenda sa isang turista maliban na lang kung hindi limitado ang araw ng bakasyon at magtatagal sa bansa .

Naghanap ako ng travel agent na nakabase sa Maldives at napatunayan ko na mas nakakatipid kapag sila ang kumuha ng resort kaysa ako ang personal na magbook sa internet. Minsan, ang mga travel agency na ito ay may mga promo tulad na lang halimbawa kung 3 araw ang naibook ay libre ang isang araw. Ganito pinapahalagaan ng gobyerno ng Maldives ang tourism industry nila kaya kadalasan ng kanilang mga mamamayan ay sa ganitong linya nagtatrabaho.

At dahil di talaga kaya ng budget ang tumagal sa mamahaling resort, pumili ako ng hotel sa Hulhumale. Isang malaking man-made island na malapit sa airport. Maraming pagpipilian na pasok sa natitirang budget ko. Ang mga hotel sa Maldives ay nag-aalok ng mga excursions tulad ng snorkeling, diving, island hopping at day tours sa mga resort. Kung limitado ang kaban ng kayamanan, pwede namang manatili sa hotel at kumuha na lamang ng mga "day pass" sa mga resort na gustong bisitahin. May mga kontak silang mga travel agent na mag-oorganisa ng pagbisita sa mga mamahaling resort.

Ang mosquito repellant at sun block ay mahalagang dalhin dahil maraming kulisap na nangangagat at lamok sa isla. Tama din ang naging desisyon ko na magdala ng sarili kong snorkeling set (mask, snorkel, at fins). Lahat ng aktibidad ay sa tubig at kailangang lumangoy. Mahal ang renta ng ganitong mga kasangkapan sa mga resort.

Sa pagpasok sa Maldives immigration, hindi naman nila hinanap sa akin ang reservation at flight itinerary dahil nakita naman siguro nila na bitbit ko ito. Subalit, nagtatanong ang opisyal kung saang hotel tutuloy. At para makasiguro, mas maayos rin na magdala ng kopya ng iqama. Nagtataka kasi sila na ang isang Pinoy na may dalang Philippine passport ay sasakay sa eroplanong papunta at may final destination na Middle East.

30 days pass ang kadalasang binibigay sa mga turista, katulad nating mga Pinoy, na bumibisita sa Maldives.

Napakaganda ng Maldives sa yamang dagat nito. Dito ko naranasan ang lumangoy na may mga pating at pagi(stingray) sa dalampasigan. Nakakatuwa na ang mga hayop na ito ang kusang pumupunta at nagpapakita sa mga tao. Hindi sila maamo ngunit hindi rin sila mailap katulad nang iniisip natin. Katulad ng Pilipinas, apektado rin nang pagbabago ng panahon ang Maldives. Naobserbahan ko na kada umaga ay may tumpok ng buhangin ang nasa dalampasigan ng resort. May mga heavy equipments din na pinapatag ito. Ang magdamagang hampas ng alon sa dalampasigan ay nagtatapyas ng buhangin sa isla. Kailangan nila itong dagdagan  para maibalik ang mga buhanging tinangay ng alon. Kapag hindi nila ito gagawin, unti-unting liliit ang kanilang isla at baka mabura ito sa mapa.

How to Apply a Dependent Single Exit Re-entry Visa Online

Ang Exit Re-entry Visa ay isang dokumento na kailangan para makalabas at makabalik sa Saudi ang isang Expat na uuwi para magbakasyon.

At dahil sa bagong teknolohiya, napadali ang pagkuha ng visa dahil hindi na kailangan pang pumunta ng Government Relation officer sa Saudi Passport Department para lang mag-apply ng visa. Iwas sa pila at ilang minuto lang ay maibigay na nila ang electronics visa na kakailanganin natin.

Para sa mga OFW na nasa Family Status o iyong nakapagdala ng pamilya dito sa Saudi, narito ang paraan kung paano kumuha ng visa para sa iyong pamilya o dependents na nasa apartment lamang. Tama! Tayo mismo, bilang kanilang SPONSOR, ay may kakayahan na makapag-apply para sa mga dependents natin gamit lamang ang internet. Siguraduhin lamang na nakarehistro kayo sa Saudi Arabia Ministry of Interior (MOI).

Saudi Exit Re-entry Visa

1. Pumunta sa website na www.moi.gov.sa at maglog in.

2. Pindutin ang iyong eDashBoard (parang profile sa facebook) at pumunta sa kolum ng iyong Dependents. Pindutin ang More detail.

3. Piliin and dependent na aaplayan mo ng exit re-entry visa. Pindutin ang More Detail.

4. Kumpirmahin na nabayaran na ang visa (online banking). Pindutin ang Issue Visa.

5. Basahing mabuti ang mga kondisyon at iclick ang loob ng kahon kapag sang-ayon kayo. Piliin ang OK.

6. Piliin ang Single sa Visa Class. Kapag sigurado na kayo sa petsa ng kanilang pagbalik, piliin ang Return Before. At kapag hindi sigurado at kung gusto nang mas mahabang validity ng visa, piliin ang Duration at ilagay kung ilang araw. (Kaya ito hanggang 9 na buwan o 270 araw basta valid pa ang iqama). Pindutin ang Issue Visa.

7. Kumpirmahin kung tama ang mga impormasyon. Pindutin ang Confirm.

8. Pindutin ang Print para sa hardcopy at idikit sa pasaporte. Makakatanggap din tayo ng SMS mula sa MOI ng transaksyon na ginawa natin.

Paalala: Ang visa hardcopy ay hindi na kailangang ipakita sa Saudi Immigration ngunit hinahanap ito sa ibang paliparan katulad ng sa Pilipinas.

Entry to Saudi without Visa for Newborn Infant

Is it possible for Filipino newborn infant to enter Saudi Arabia without visa?

Answer is Yes.

"Visa is on arrival for babies. He only needs passport". Ito ang sabi sa akin ng Government Relation officer ng kumpanyang pinapasukan ko. Gusto ko sanang iextend ang reentry visa ang noo'y buntis ko pang misis. Sa Pinas kasi siya manganganak. Naging kampante naman ako sa pag-uusap naming iyon.

Nakaplano na ang susunod naming gagawin paglabas ng baby para makabalik si misis sa kaharian na di pa maexpire ang 6 months exit-reentry visa niya. Three months before due date ay nagbiyahe na si Misis pauwi sa Pinas ayon na rin sa bilin ng doktor. Ibig sabihin, mayroon lamang kaming tatlong buwan para asikasuhin ang mga dokumentong kailangan ni baby para maisama siya pabalik.

DOCUMENTS. Pagkapanganak kay baby, iniregister na kaagad siya sa munisipyo at humiling ng endorsement letter mula sa Municipal Local Civil Registrar para maiforward kaagad sa National Statistics Office ang kanyang local birth certificate. (Tatlo hanggang apat na buwan ang proseso nito kapag walang endorsement). Ang letter at LCR birth certificate ay ipinadala sa Regional NSO through LBC.

Pagkatapos ng dalawang linggo, pilit na ibiniyahe si baby sa Department of Foreign Affairs para mag-apply ng passport. At noong time na iyon nalaman namin na ready na rin pala sa system ng NSO ang birth certificate ni baby. Dahil infant pa ay di na kailangan ng priority number at nakakuha kaagad kami ng kopya ng birth certificate mula sa NSO.

Sa loob ng isang araw ay natapos ang mga kailangang dokumento at nakapag-apply ng passport si baby sa DFA. 12 working days and rush releasing ng passport ayon sa DFA at dahil may mga holidays ay halos mag-iisang buwan na bago natanggap ang passport.

Habang naghihintay ng passport, naiprocess rin namin ang pag-authenticate (red ribbon) ng kanyang birth certificate na lalo pang napadali dahil sa www.authenticationexpress.com. Isang email lang at within a week ay matatanggap na ang authenticated birth certificate. Ganun din ang paglagay ng saudi stamp ng embassy na makukuha within 3 days sa tulong ng dati kong agency.

 Courtesy of dfaredribbon.blogspot.com

Sa loob ng dalawang buwan ay nakahanda na si baby. May passport na ito. May authenticated birth certificate pa. Hawak na rin namin ang kanyang flight ticket paalis ng Pilipinas.

AIRPORT. "Hindi allowed yan Sir. Hindi talaga pwede yan! Di puwedeng magbiyahe ng walang visa kahit baby!". Kailangan pang makipagtalo sa visa checker ng NAIA airport. Ayaw kaming icheck-in ng airline. First time ba nila sa Pilipinas na magkaroon ng ganitong kaso? "Sir, Maam, yung nagrerelease po ng visa namin sa Saudi ang nagsabi na di na kailangan ng visa ni baby dahil resident card holder kami".

Naging busy ang check-in counter ng airline. May libro silang binubuklat. May mga taong tinawagan. Malamang pati immigration sa Saudi ay nakausap din nila. Nahold kami ng dalawang oras. At sa katagalan, nakacheck-in din kami at wala man lang ni isang tanong at tinatakan ang passport ni baby nang dumaan kami ng Philippine Immigration.

Pagdating namin sa Saudi immigration, may kaunting interview sa amin at binigyan ng entry stamp at visa on arrival ang passport ni baby. Wala nang ibang dokumentong hiningi. Paglilinaw ng Saudi immigration officer, "Three months old and below are consider as newborn. They are allowed to enter without visa as long as their parents are iqama holder. "

Pinoy Permanent Family Visa

Hindi lang dalawang beses kundi paulit-ulit kong inievaluate ang benipisyong ito. May mga pangamba ngunit marami na rin namang pamilyang Pilipino ang nakaraos at nakasanayan na ang konserbatibong pamumuhay dito sa Saudi.

Kadalasang nagdadala ng mga pamilya dito ay yong may mga supervisory positions at mga direct hired employees ng kumpanya. May karagdagang benipisyo kasi para sa isang empleyado kung kasama ang pamilya. Maliban sa kasama mo na ang pamilya ay sagot pa ng kumpanya ang family housing, family medical insurance, vacation flight ticket at education ng mga bata.

Ang mga sumusunod na mga dokumento ang mga kakailanganin para sa pag-aaply ng permanent family visa. Madalas ang asawa o kamag-anak na nasa Pilipinas ang gumagawa nito
1. Diploma at Transcript of Records (orig)
2. Marriage Certificate (orig)
3. Birth Certificates ng mga anak

Original copy with attestment

Ang mga dokumentong ito ay kailangan attested ng DFA at naka red ribbon.
Ang original diploma at TOR ay kailangang kunin sa university kung saan tayo nagtapos. Sa mga non-degree holders, ang diploma ay kailangang authenticated ng TESDA at sa mga degree holders ay ng CHED sa rehiyon. Halimbawa kung nakapagtapos ka ng kursong Mekaniko sa isang trade school sa Laguna, ay kailangan mong ipauthenticate ito sa TESDA region 4. Kapag naisubmit mo na ito sa TESDA, sila na ang bahalang magpaattest sa DFA at isesend nila ito sa iyo through DHL. 
Para naman sa marriage at birth certificates, kailangan mo lang mag-apply sa NSO at sila na ang mag-aasikaso ng attestment ng iyong mga certificates through DHL. Lahat ng mga transaksyon ay may mga bayad. Alam naman natin na walang libre sa Pinas.

Kapag kumpleto na ang mga dokumento, kailangang ipadala ito dito sa Saudi. Bilang direct hired employee, ito ang mga ginawa ko. Pasalamat na lang dahil may ganitong department sa kumpanya. Medyo di kahirapan ang pag-aaply at walang babayaran.
1. Ipinatranslate sa Arabic ang diploma at TOR, marriage and birth certificates.
2. Referral Certificate mula sa Human Resource ng kumpanya na ako ay entitle ng family status at may karapatang mag invite ng pamilya. Kailangan ito para makapag-apply ng Family visa.
3. Pumunta sa Goverment Relation ng kumpanya para sa mag-apply ng family visa at  "yellow slip". Kailangan mong isubmit ang original na diploma, TOR, marriage, birth certificates ng mga anak, dependent passport clear copies, referral certificate, at iqama clear copy.

Arabic translated documents

Kapag natanggap na ang yellow slip, kailangang ipadala ito sa agency sa Pinas kung saan tayo nahired. Sila ang mag-aasikaso nito para mapadali. Tanging ang agency lang ang inientertain ng Saudi embassy sa Pinas sa mga ganitong bagay. Ang serbisyong ito ng agency ay may bayad. Di naman natin iniisip yong bayad, ang mahalaga ay makasama na ang pamilya.
Ito ang gagawin ng mga dependents sa Pinas.
1. Ihanda ang kakailanganing transaction fees sa agency.
2. Isubmit ang original passport sa agency.
3. Maghanda sa medical examination referred by agency.

Kapag ayos na ang lahat at nakastamp na ang visa sa mga passports, pwede na tayong bumili ng flight tickets para sa pamilya.